Решение #2846538 economic_new

4-1201-2503/14312-сонли иш ГУЛИСТОН ТУМАНЛАРАРО ИҚТИСОДИЙ СУДИНИНГ ЎЗБЕКИСТОН РЕСПУБЛИКАСИ НОМИДАН ҲАЛ ҚИЛУВ ҚАРОРИ Гулистон шаҳри 2025 йил 17 ноябрь Гулистон туманлараро иқтисодий суди судьяси М.Холиков раислигида, судья ёрдамичиси Ю.Абизовнинг суд мажлиси котиблигида, тарафлардан даъвогар вакили Б.Қорабоев (ишончнома асосида) иштирокида, Ўзбекистон Республикаси Савдо-саноат палатаси Сирдарё вилояти ҳудудий бошқармасининг даъвогар “ U IR R D” масъулияти чекланган жамияти манфаатида жавобгар “K ’ rikqurilish” акциядорлик жамияти ҳисобидан 22 400 000 сўм асосий қарз ундириш тўғрисидаги даъво аризаси бўйича қўзғатилган иқтисодий ишни, суднинг маъмурий биносида, видеоконференцалоқа режимидаги очиқ суд мажлисида кўриб чиқиб, қуйидагиларни а н и қ л а д и: “ U IR R D” масъулияти чекланган жамияти (даъвогар) ва “K ’ rikqurilish” акциядорлик жамияти (жавобгар)ўртасида Давлат харидлари электрон тизимида 2025 йил 22 майда (лот 252210084722906) ўтказилган электрон давлат харидлари натижаси бўйича автомобиль аккумлятори (маҳсулот) етказиб бериш тўғрисида 47229906-сонлишартнома тузилган. Шартноманинг 1-бандида ижрочи (даъвогар) маҳсулотни етказиб бериши, буюртмачи (жавобгар) қабул қилиши ва тўловини амалга ошириш мажбуриятини олган. Тарафлар ўртасида тасдиқланган 2025 йил 18 июндаги 10/06-03-сонли ҳисобварақ-фактураларга мувофиқ даъвогар жами 22 400 000 сўм қийматидаги автошина маҳсулотларини жавобгарга етказиб берган. Жавобгар мажбуриятини тўлиқ бажармаганлиги сабабли низо келиб чиқиб, Ўзбекистон Республикаси Савдо-саноат палатаси Сирдарё вилояти ҳудудий бошқармаси (Палата) даъвогар манфаатида Гулистон туманлараро иқтисодий судига даъво аризаси билан мурожаат қилиб, жавобгар ҳисобидан 22 400 000 сўм асосий қарз ундиришни сўраган. Суднинг 2025 йил 24 октябрдаги ажрими билан “ t irj ” АЖ низонинг предметига нисбатан мустақил талаблар билан арз қилмайдиган учинчи шахс сифатида ишда иштирок этишга жалб қилинган. Суд муҳокамасининг вақти ва жойи тўғрисида тегишли тартибда хабардор қилинган Палата, “ t irj ” АЖ ва жавобгар суд мажлисида вакили иштирокини таъминламади. Ўзбекистон Республикасининг Иқтисодий процессуал кодекси (ИПК) 128-моддасига кўра, агар суд иқтисодий суд ишларини юритиш иштирокчиси ўзига юборилган ажримнинг кўчирма нусхасини олганлиги ёки ушбу Кодексда назарда тутилган бошқа усулда хабардор қилинганлиги тўғрисида суд мажлиси бошлангунига қадар маълумотларга эга бўлса, ушбу иштирокчи тегишли тарзда хабардор қилинган деб ҳисобланади. Суд, ИПКнинг 127-128 ва 170-моддалари талабларига кўра, ишни Палата, “ t irj ” АЖ ва жавобгар иштирокисиз кўриш мумкин деб ҳисоблайди. Суд мажлисида иштирок этган даъвогар вакили даъво аризани қувватлаб, маълумотнома тақдим этиб, даъво аризада техник хатога кўра автошина етказилганлиги кўрсатилган бўлса-да, аслида 47229906-сонли шартнома бўйича автомобиль аккумлятори етказилганлиги, бу ҳақида ҳисобварақ-фактура тақдим этилганлиги, 2025 йил 17 ноябрь ҳолатига қарздорлик сўндирилмаганлигини маълум қилиб, даъво аризани қаноатлантиришни сўради. Ўтган суд мажлисида иштирок этган жавобгар вакили даъво талабини тан олиб, қонуний қарор қабул қилишни сўради. Суд, ишда иштирок этувчи шахсларнинг тушунтиришларини тинглаб, ишдаги мавжуд ҳужжатларга ҳуқуқий баҳо бериб, қуйидаги асосларга кўра даъво талабларини қаноатлантиришни, суд харажатларини жавобгардан ундиришни лозим топади. Ўзбекистон Республикаси Фуқаролик кодексининг (ФК) 236-моддасига кўра, мажбуриятлар мажбурият шартларига ва қонунчилик талабларига мувофиқ, бундай шартлар ва талаблар бўлмаганида эса - иш муомаласи одатларига ёки одатда қўйиладиган бошқа талабларга мувофиқ лозим даражада бажарилиши керак. ФКнинг 437-моддасига асосан маҳсулот етказиб бериш шартномасига мувофиқ тадбиркорлик фаолияти билан шуғулланаётган маҳсулот етказиб берувчи — сотувчи шартлашилган муддатда ёки муддатларда ўзи ишлаб чиқарадиган ёхуд сотиб оладиган товарларни сотиб олувчига тадбиркорлик фаолиятида фойдаланиш учун ёки шахсий, оилавий мақсадларда, рўзғорда ва шунга ўхшаш бошқа мақсадларда фойдаланиш билан боғлиқ бўлмаган бошқа мақсадларда фойдаланиш учун топшириш, сотиб олувчи эса товарларни қабул қилиш ва уларнинг ҳақини тўлаш мажбуриятини олади. ФКнинг 419-моддаси биринчи қисмига асосан, агар қонунчилик ёки олди-сотди шартномасининг шартларидан товар баҳосини муайян муддатда тўлаш мажбурияти келиб чиқмаса, сотиб олувчи уни сотувчи ўзига товарни ёки ушбу товарни тасарруф қилиш ҳужжатларини берганидан сўнг кечиктирмасдан тўлаши лозим. ФКнинг 242-моддасига мувофиқ, агар мажбуриятни бажариш муддати кўрсатилмаган ёки талаб қилиб олиш пайти билан белгилаб қўйилган бўлса, кредитор ҳар қачон ижрони талаб қилишга, қарздор эса — ижрони ҳар қачон амалга оширишга ҳақли бўлади. Мажбуриятни дарҳол бажариш вазифаси қонун, шартнома ёки мажбуриятнинг моҳиятидан англашилмаса, қарздор бундай мажбуриятни кредитор талаб қилган кундан бошлаб етти кунлик муддат ичида бажариши шарт. Шартноманинг 2.6-бандига кўра, буюртмачи товарни қабул қилиб олгандан бошлаб уч иш куни ичида шахсий кабинетидан Операторга юборган хабари асосида Оператор бир иш куни давомида тўлов маблағини Ижрочининг ҳисобрақамга белгиланган тарибда ўтказади, ижрочининг закалатига қўйилган бандни бекор қилади ва тегишли шахсий ҳисобварағига қайтаради. Жавобгар томонидан етказиб берилган маҳсулот учун тўловлар амалга оширилмагач, 22 400 000 сўм қарздорлик юзага келган. Даъвогар юзага келган қарздорликни тўлаш юзасидан жавобгарга 2025 йил 10 октябрда талабнома юборган. Лекин, талабнома жавобгар томонидан жавобсиз қолдирилган. Даъвогар томонидан тақдим этилган 2025 йил 17 ноябрдаги 116-сонли маълумотномага кўра, 2025 йил 17 ноябрь ҳолатига қарздорлик бўйича тўлов амалга оширилмаганлиги аниқланди. Юқоридагиларга кўра, суд даъвогар томонидан маҳсулот етказиб берилганлиги ишда мавжуд ҳисобварақ-фактура, тарафлар вакилларининг тушунтиришлари ва ишга алоқадор бошқа ҳужжатлар билан ўз исботини топганлиги сабабли Палатанинг асосий қарз ундириш ҳақидаги даъво талабини асосли деб топиб, даъво аризани қаноатлантиришни, жавобгар ҳисобидан даъвогар фойдасига 22 400 000 сўм қарздорлик ундиришни лозим топади. ИПК 118-моддасининг биринчи қисмида суд харажатлари ишда иштирок этувчи шахсларнинг қаноатлантирилган даъво талаблари миқдорига мутаносиб равишда уларнинг зиммасига юклатилиши белгиланган. “Давлат божи тўғрисида”ги Ўзбекистон Республикаси Қонунига илова сифатида тасдиқлаган Давлат божи ставкаларининг миқдорига кўра, иқтисодий судларга бериладиган мулкий хусусиятга эга даъво аризаларидан даъво баҳосининг 2 фоизи миқдорида, бироқ БҲМнинг 1 бараваридан кам бўлмаган миқдорда давлат божи ундирилиши белгиланган. Юқоридагиларга кўра, суд даъво талаблари асосли киритилганлиги, судга даъво аризаси киритилишида давлат божи тўланмаганлигини инобатга олиб, суд иш бўйича ундирилиши лозим бўлган суд харажатларини тўлиқ жавобгар зиммасига юклашни, жавобгар ҳисобидан республика бюджетига даъво баҳоси 22 400 000 сўмнинг 2 фоизи, яъни 448 000 сўм давлат божи ва даъвогар фойдасига 41 200 сўм почта харажатини, шунингдек, Ўзбекистон Республикаси Олий судининг фойдасига ишни видеоконференцалоқа режимида кўриш билан боғлиқ 103 000 сўм харажатни ундиришни лозим топади. лозим топади. Бинобарин, Ўзбекистон Республикаси Иқтисодий процессуал кодексининг 118, 127-128, 170, 176-180, 186, 192-моддаларини қўллаб, суд қ а р о р қ и л а д и: Даъво ариза қаноатлантирилсин. “K ’ rikqurilish” акциядорлик жамияти ҳисобидан: - “ U IR R D” масъулияти чекланган жамияти фойдасига 22 400 000 сўм қарздорлик ва 41 200 сўм почта харажати; - Республика бюджетига 448 000 сўм давлат божи; - Ўзбекистон Республикаси Олий судининг фойдасига ишни видеоконференцалоқа режимида кўриш билан боғлиқ 103 000 сўм харажат ундирилсин. Ҳал қилув қарори қабул қилингандан кейин бир ойлик муддат ўтгач қонуний кучга киради. Ҳал қилув қарори қонуний кучга киргач, ижро варақалари берилсин. Ҳал қилув қарори устидан у қабул қилинган кундан эътиборан бир ой ичида шу суд орқали Сирдарё вилоят судининг иқтисодий ишлари бўйича судлов ҳайъатига апелляция тартибида ёки қонуний кучга кирган ва апелляция тартибида кўрилмаган ҳал қилув қарори устидан у қонуний кучга кирган кундан эътиборан олти ой ичида кассация тартибида шикоят берилиши ёхуд прокурор протест келтириши мумкин. Судья М.А. Холиков