Решение #78285 Уголовные

ҲУКМ 2025 йил март ойининг 27 куни, Тошкент шаҳар жиноят ишлари бўйича Чилонзор туман суди, суд биносида, очиқ суд мажлисида, раислик қилувчи, судья С.Мамадиев, суд мажлиси котиби судья ёрдамчиси Ш.Сайдуллаев, тарафлардан давлат айбловчиси – Чилонзор туман прокурорининг катта ёрдамчиси Н.Рустамов, судланувчи А.Ахмедалиев ва унинг ҳимоячиси “MMM-HIMOYA” адвокатлик бюросининг адвокати М.Каримов, жабрланувчи С.Мажитов ва Ж.Игамбердиевнинг иштирокида, Ахмедалиев Азизбек Равшанбековичга нисбатан 1-1006-2502/96-сонли жиноят ишини кўриб чиқди. Иш ҳужжатларига кўра: Ахмедалиев Азизбек Равшанбекович (Axmedaliyev Azizbek Ravshanbekovich), 1988 йил 18 январда Андижон вилоятида туғилган, миллати ўзбек, Ўзбекистон фуқароси, маълумоти ўрта, оилали, муқаддам; 1. жиноят ишлари бўйича Фарғона шаҳар судининг 2010 йил 7 сентябрдаги ҳукмига кўра, Ўзбекистон Республикаси ЖКнинг 182-моддаси 2-қисми ҳамда 223моддаси 2-қисми билан ЖКнинг 57-моддаси тартибида иш ҳақининг 30 фоизи давлат даромади ҳисобига ушлаб қолган ҳолда 2 йил ахлоқ тузатиш ишлари жазоси тайинланган, жиноят ишлари бўйича Андижон шаҳар судининг 2012 йил 19 майдаги ажримига кўра, ЖКнинг 73-моддаси тартибида ўталмай қолган 9 ой 2 кун ахлоқ тузатиш ишлари жазосидан муддатидан илгари шартли равишда озод қилинган; 2. жиноят ишлари бўйича Яшнобод туман судининг 2016 йил 15 декабрдаги ҳукмига кўра, Ўзбекистон Республикаси ЖКнинг 169-моддаси 3-қисми “а” банди билан 6 йил озодликдан маҳрум қилиш жазоси тайинланган, жиноят ишлари бўйича Тошкент шаҳар суди апелляция инстанциясининг 2017 йил 27 январдаги ажримига кўра, ҳукм ўзгартирилиб, 5 йил озодликдан маҳрум қилиш жазоси тайинланган, 2016 йил 12 октябрдаги амнистия актининг 6-бандининг “а” кичик бандига асосан ўталмай қолган жазо муддати учдан бир қисмига қисқартирилган, жиноят ишлари бўйича Зафаробод тумани судининг 31.10.2017 йилдаги ажримига кўра, ўталмаган 2 йил 2 ой 19 кун озодликдан маҳрум қилиш жазоси ЖКнинг 74-моддасига асосан, шу муддатга ахлоқ тузатиш ишлари жазосига алмаштирилган, Андижон вилояти, Андижон шаҳри, Далварзин МФЙ, Мунтазир кўчаси, 35-уйда рўйхатда турувчи, туман судининг 2024 йил 18 майдаги ажримига кўра, сиртдан “қамоққа олиш” тарзидаги эҳтиёт чораси қўлланилган, 2024 йил 29 июнда ушланиб, қамоқда сақланаётган, айблов хулосаси нусхасини муддатида олган, Ўзбекистон Республикаси ЖКнинг 168-моддаси 4-қисми “а” банди ва 168моддаси 4-қисми “а” банди билан айбланган. Суд, судланувчи, жабрланувчиларнинг кўрсатувларини тинглаб, жиноят иши ҳужжатларини ўрганиб чиқиб ва ишдаги мавжуд бўлган далилларга баҳо бериб, қуйидагиларни Судланувчи А.Ахмедалиев 2023 йил 13 декабрь куни Чилонзор тумани, 18мавзесида жойлашган “Carrent-A” номли МЧЖ биносида, Мажитов Самариддин Садриддин ўғлини алдаб, ишончига кириб, жамиятга қарашли нархи 15.000 АҚШ долларлик (Ўзбекистон Республикаси Марказий банкининг маълумотига кўра, 2023 йил 13 декабрь кундаги ҳолатига кўра, 1 АҚШ долларининг сўмга нисбатан қиймати 12.349,00 сўм қилиб белгиланган бўлиб 15.000 АҚШ долларининг сўмга нисбатан эквиваленти 185.235.000 сўм тенглиги аниқланган) давлат рақами 01Q576XB бўлган “Laсetti” русумли автомашинани ўзининг шахсига оид ҳужжатларини тақдим қилиш орқали 24 соат давомида вақтинча ҳайдаш учун ижарага олиб, мазкур автомашинани ўз вақтида олиб келиб топширмай, номаълум шахсларга сотиб юбориб, пулларини ўз эҳтиёжлари учун сарфлаб юборган. Шунингдек, А.Ахмедалиев ўзининг жиноий хатти-ҳаракатларини давом эттириб, такроран, алдаш ва ишончни суиистимол қилиш йўли билан ўзгани мол-мулкини қўлга киритиш мақсадида, 2023 йил 20 декабрь куни Сирғали тумани “Сайилгох” кўчасида жойлашган “Капитал банк” биноси ташқи томонида, Игамбердиев Жура Тулкуновични алдаб, ишончига кириб, мазкур банк орқали муддатли тўлов асосида расмийлаштириб олинган ўзига тегишли, нархи 227.970.000 сўмлик, давлат рақами 01R803EC бўлган “Onix” русумли автомашинасини сотиб олишини ва автомашинанинг банк қарздорлигини 2023 йил 29 декабрь кунига қадар тўлиқ тўлаб беришни ваъда қилиб, олдиндан 1.500 АҚШ доллари миқдоридаги пулларни бериб, автомашинани 1 ойлик ишончнома асосида вақтинчалик ҳайдаш учун ўзи билан олиб кетиб, берган ваъдасини бажармасдан автомашинани “Carrent-A” МЧЖ биносига гаров сифатида топшириб кетган. Судланувчи А.Ахмедалиев суд мажлисида айбловга қисман иқрорлигини билдириб, ҳақиқатдан ҳам 2023 йил декабрь ойида Тошкент шаҳри, Чилонзор тумани 18-мавзесида жойлашган “Rentcar” МЧЖга қарашли давлат рақами 01Q576XB бўлган “Lesetti” русумли автомашинани ижарага соз ҳолатда тилхат ёзиб олиб кетганини, шундан сўнг ўзининг яшаш манзилига борганини, автомашинани маҳалласида ҳайдаб юрганини, “Абуллох” исмли шахсдан 13.000 АҚШ доллари миқдоридаги қарзи борлигини, қарзини ўз вақтида қайтариб бераолмаганини, шу сабабли “Абуллох”исмли шахс бошқариб юрган давлат рақами 01Q576XB бўлган “Lesetti” русумли автомашинани қарзини қайтарганидан сўнг қайтариб беришини айтиб, гаров тариқасида олиб қўйганини, шундан сўнг Тошкент шаҳрига қайтиб келганини, 2023 йил август ойида тадбиркорлик қилиш мақсадида танишган аёли, яъни Г.Хайдаровада автомашина йўқлиги сабабли, муддатли тўлов асосида ўзига аввалдан нотаниш бўлган Игамбердиев Журага тегишли давлат рақам 01R803EC бўлган “Onix” русумли автомашина бошланғич тўлов тариқасида 1.700 АҚШ доллари бериб, сотиб олишга келишганини, мазкур автомашина банк ихтиёрида турганини, банк тўловлари ўз вақтида тўланмагани сабабли, банк олиб қўйган бўлганини, автомашинанинг банк қарздорлигини тўлиқ тўласа, автомашинанинг навбатдаги банк тўловларини амалга ошириб келиш шарти билан сотиб олганини, шундан сўнг Ж.Игамбердиевга тегишли давлат рақам 01R803EC бўлган “Onix” русумли автомашинани банкдан олиб чиқиб кетганини, 3 ой давомида бошқариб юрганини, орадан бир қанча вақт ўтгандан сўнг Ж.Игамбердиев қўнғироқ қилиб, банкдан қўнғироқ қилаётганини, автомашинанинг ойлик тўловларни амалга ошириш керак эканини айтганини, шундан сўнг унга 4.000.000 сўм миқдоридаги пулларни ўтказиб берганини, сўнг яна 2.000.000 сўм миқдоридаги пулларни ташлаб берганини, шундан сўнг унга Ж.Игамбердиев автомашина учун тўловларни тўлиқ тўлаб бериши кераклигини айтганини, унга автомашина учун ойлик тўловларни тўлиқ талай олмаслигини, шу сабабли автомашинани қайтариб олишини айтганини, у ҳам автомашинани қайтариб олмаслигини, кридетни тўлай олмаслигини, хохласам автомашинани сотиб юбориши мумкинлигини айтганини, орадан бир қанча вақт ўтгандан сўнг унга Ж.Игамбердиев қўнғироқ қилиб автомашинани олиб бориб беришини у автомашинани олиб, банкка топшириб юборишини айтганини, аммо у автомашини олиб бориб бермаганини, укаси Ахмедалиев Авазбек орқали Чилонзор туманидаги “Ренткар” МЧЖда ишловчи С.Мажитовга етказиб берганини, шу вақтда С.Мажитов автомашина тех паспортини кўриб, автомашина бошқа шахсга тегишли эканини сезиб қолиб, 102-хизматига мурожаат қилганини, шундан сўнг ИИБ ҳодимлари мазкур автомашинани ИИБ биносига олиб келишганини билдириб, қилган ишидан пушаймонлигини инобатга олиб, унга нисбатан енгилроқ жазо тайинлашни сўраб кўрсатув берди. Суд мажлисида жабрланувчи Ж.Игамбердиев, 2023 йил 11 август куни ўзи ҳайдаш учун Сирғали туманида жойлашган “Капитал банк” орқали муддатли тўлов эвазига 5 йиллик шартнома асосида “Оnix” русумли автомашина олганини, автомашинанинг ҳар ойлик кредит тўлови тахминан 7.000.000 сўм атрофида бўлганини, автомашина учун ҳар ойлик тўловни амалга ошириб ҳайдаб келаётганини, лекин 2023 йил 19 декабрь куни моддий томондан етишмовчилик юзага келиб автомашина учун навбатдаги ойлик тўловни тўлай олмагани сабабли, кридет эвазига олган автомашинани “Капитал банк” ихтиёрига олиб бориб топширганини, шундан сўнг ушбу автомашинани сотиши тўғрисида бир нечта танишларига айтганини, 2023 йил 20 декабрь куни таниши Қобилов Шерзод қўнғироқ қилиб автомашинани ҳақиқатдан сотаётганини сўраганини, унга ҳақиқатдан ҳам сотаётганини пул зарурлигини айтганини, шу вақтда таниши Ш.Қобилов автомашинани сотиб олиш учун харидор борлигини айтганини, шундан сўнг унга автомашина ҳозирда уйида эмаслигини, уни ойлик кредитини тўлай олмаганлиги сабабли, уни банкка топширганини айтганини, шунда таниши “Шерзод”нинг харидори автомашинани банкдан ойлик тўловини амалга ошириб олиб чиқишини ва автомашина учун унга 400 АҚШ доллари миқдоридаги пулларни бериб ойлик кредитларни тўлиқ тўлаб беришни айтганини, шундан сўнг унинг гапига ишониб, 2023 йил 20 декабрь куни юзмаюз кўришиб гаплашиш мақсадида Ш.Қобиловнинг харидори билан Сирғали туманида жойлашган “Капитал банк” ёнида кўришганини, Ш.Қолибов уни харидор билан таништириб қўйганини, автомашинани сотиб олмоқчи бўлган харидор ўзини А.Ахмадалиев эканини айтиб, автомашинани сотиб олиш истагида эканини айтганини, шу жойда таниши Ш.Қобилов харидори бўлган А.Ахмадалиевнинг ёнида келишилган миқдордаги пул йўқлигини, ёнида 1.500 АҚШ доллари миқдоридаги пуллари борлигини ушбу пуллардан 10.000.000 миқдоридаги пулларни мошинанинг ойлик қарздорлигини бир қисмини тўлаб, олиб чиқишини ва 2023 йил 29 декабрь куни “Шерзод”нинг харидори А.Ахмадалиев унга автомашинанинг мавжуд кредит қарздорлигини тўлиқ тўлаб автомашина учун 400 АҚШ доллари миқдоридаги пулларни беришини айтганини, шундан сўнг уларнинг гапига ишониб автомашинани банкдан олиб чиқиб, “Шерзод” орқали А.Амадалиевга 1 ойлик ишончнома асосида Ўзбекитсон Республикасида ҳайдаш ҳуқуқи билан, яъни сотиш ҳуқуқсиз топширганини, шундан сўнг таниши “Шерзод”га автомашинани 1.500 АҚШ долларига келишганини билиб унга А.Ахмадалиев томонидан берилган пулдан қолган 700 АҚШ долларни ҳам банкка тўлов қилиб юборилишини айтганини, аммо банкка тўловни амалга оширмасдан 700 АҚШ долларини залок сифатида олиб қолишини айтиб, 2023 йил 29 декабрь куни автомашина учун келишилган пулни А.Ахмадалиев тўлаб бера олмаса залок сифатида олиб қолинган 700 АҚШ долларни банкка тўлов қилиб автомашинани ундан қайтариб олиб беришини айтганини, лекин орадан 10 кун ўтишига қарамасдан таниши “Шерзод”нинг харидори А.Ахмадалиев автомашинанинг тўлов пулларни бермасдан юрганини, шундан сўнг у таниши “Шерзод”га ушбу ҳолат бўйича бир неча маротаба қўнғироқ қилган вақтида унга пулларни тез кунда қилиб бераман деб айтгани учун сабр қилиб туришини айтганини, шундан сўнг орадан тахминан 4 ой ўтиб “Оnix” русумли давлат рақам белигиси 01R803EC бўлган автомашина учун А.Ахмадалиев 4.000.000 сўм миқдоридаги пулларни картасига ташлаб берганини, бироз сабр қилиб туришини, ишлари юришмасдан турганини айтганини, шундан сўнг унинг опаси “Гули” унга 2.000.000 сўм миқдоридаги пулларни картадан ташлаб берганини, шундан сўнг у “Шерзод”га қўнғироқ қилиб ундан 700 АҚШ долларни беришини банкка тўлов қилиши кераклигини айтганини, таниши “Шерзод” 200 АҚШ доллари миқдоридаги пулларни бўлиб-бўлиб бериб, 500 АҚШ доллари миқдоридаги пулларини бермаганини, 2024 йил 7 март куни менга ИИБ ҳодимлари қўнғироқ қилиб, “Оnix” русумли автомашина Чилонзор тумани ИИБ биносида сақланаётганини автомашинани нотаниш бўлган фуқарога гаров сифатида бериб кетилмоқчи бўлганини, ушбу ҳолат бўйича ИИБ биносига келишини сўрагани сабабли ИИБ биносига келиб, профилактика инспектори билан учрашганини, профилактика инспектори автомашинани кимга берганини сўраганини, унга А.Ахмадалиевга 1 ойлик ишончнома асосида 2023 йил 20 декабрь кунидан 2024 йил 19 январь кунига қадар сотиш ҳуқуқисиз ишончнома асосида ҳайдашга берганини маълум қилганини, шу вақтда ИИБ ҳодими автомашинани А.Ахмадалиевнинг укаси гаров сифатида унга нотаниш бўлган фуқарога топшириб кетаётганини маълум қилганини, терговда унга тегишли бўлган “Оnix” русумли автомашинани қайтарилганлигини маълум қилиб, судланувчига нисбатан қонун доирасида жазо тайинлашни сўради. Суд мажлисида жабрланувчи С.Мажитов, Тошкент шаҳри, Чилонзор тумани, 19-мавзеси, “Ёшлик” номли кўп қаватли уйнинг биринчи қаватида автомашиналарни вақтинча бошқариш учун бериш фаолияти билан шуғулланиб келганини, “Carrent A” МЧЖда иш бошқарувчи лавозимида ишлаганини, 2023 йил 13 декабрь куни Чилонзор тумани 18-мавзедаги “Мехрижон” МФЙ ҳудудида жойлашган юқорида номи келтириб ўтилган жамиятга тегишли давлат рақам белгиси 01Q576XB бўлган “Laсetti” номли автомашинани А.Ахмадалиев келиб ушбу автомашинани белгиланган миқдордаги тўловини амалга ошириб, тегишли ҳужжатларни тақдим қилиб, ўз қўли билан автомашинани соз ҳолда олганлиги тўғрисида тилхат ёзиб, автомашинани олиб кетганини, шу вақтда ушбу шахс унга автомашинадан бир кун давомида фойдаланишини маълум қилганини, лекин ушбу шахс автомашинани белгиланган вақт ичида олиб келмаганини, шундан сўнг у ушбу шахсга қўнғироқ қилиб, ҳозирда у Андижон вилоятида эканлигини, зарур ишлари борлигини айтиб, Тошкент шаҳрига етиб кела олмаслигини айтиб, автомашинанинг кунлик ижара пулини палстик карта орқали ташлаб беришини айтганлиги сабабли гапларига ишониб, ишхонасида бўлган мижозлар томонидан қолдириб кетилган пластик картага ташлаб беришини айтганини, сўнг ушбу шахс карта орқали унга юқоридаги жентра автомашинаси учун тахминан 8-9 кунлик тўлов пули яъни тахминан 4.500.000 сўм миқдоридаги пулларни ташлаб берганини, орадан тахминан 2-3 кун ўтганидан сўнг А.Ахмадалиевга қўнғироқ қилганида унинг телефон аппарати ўчирилган бўлганлигини, тахминан 2023 йил 26-27 декабрь куни унга нотаниш бўлган “Гули” исмли шахс қўнғироқ қилиб, ўзини А.Ахмадалиевнинг турмуш ўртоғи эканини айтиб, Тошкент шаҳридаги ишхонасига келганини маълум қилиб, у билан кўришишини илтимос қилганини, сўнг у ишхонаси олдида “Гули” исмли аёл билан кўришганини, шу вақтда унга ўзини А.Ахмадалиевнинг турмуш ўртоғиман деб таништирган “Гули” А.Ахмадалиевни Қирғизистон Республикасига товар олиб келиш учун чиқиб кетганини, ҳозирги вақтда у томонидан вақтинча ҳайдаш учун олиб кетилган “Жентра” русумли автомашина А.Ахмадалиевнинг бошқа шахсдан қарзи бўлгани учун автомашинани гаров сифатида топширганлиги сабабли автомашинанинг кунлик ижара ҳаққини ўзи яъни “Гули” тўлаб туришини айтиб, автомашинанинг 10 кунлик ижараси учун 400 АҚШ доллари миқдоридаги пулларни бериб кетганини, шундан сўнг у “Гули”ни гапларига ишониб у билан телефон орқали хабардор бўлиб турганини, тахминан 2024 йил 28 январь кунига қадар кунлик автомашина ижра пулини бериб келганини, шундан сўнг 2024 йилнинг тахминан февраль ойининг бошларида “Гули”га қўнғироқ қилиб ундан автомашинанинг навбатдаги ижара ҳақини тўлашини ёки автомашинани олиб келиб беришини сўраганида у фарзанди АҚШда ишлашини айтиб, ҳар ойнинг 17-18 санасига қадар “Гули”га пул юборишини айтиб, ундан бир неча кун сабр қилиб туришини ва унга фуқаролик паспортини ташлаб беришини яъни у унинг номига Америкадаги ўғли томонидан 14.000 АҚШ доллари миқдоридаги пулларни ташлаб беришини айтиб, уни ишонтирганини, шундан сўнг Гулига укаси Мажитов Аббосбек Садриддин ўғлининг фуқаролик паспортини ташлаб берганини, 2024 йил тахминан 17-19 февраль кунлари Гулига қўнғироқ қилган вақтида укасининг номига Америкадан пул тушганини айтиб, 9 дона рақамлик кодни юбориб, ушбу пулларни банкдан олишини айтганини, шу вақтда ундан қанча пул тушганини сўраганида у ўғлига 14.000 АҚШ доллари ташлаши кераклигини айтиб, аниқ қанча пул ташлаганидан хабари йўқлигини маълум қилганини, шундан сўнг укаси А.Мажитов билан биргаликда банкларга бориб, Гули томонидан ташлаб берилган кодни тақдим қилган вақтида банк ходимлари ушбу кодга ҳеч қандай пул маблағи келмаганини айтганини, сўнг Гулига қўнғироқ қилиб унга ҳеч қандай пул келмаганини айтганини, шу вақтда унга автомашинани ундан у олмаганини айтиб, ҳеч қандай пул бермаслигини айтганини, қўнғироқларига жавоб бермай қўйганини, орадан тахминан 20 кун вақт ўтиб, яъни 2024 йил 6 март куни Гули қўнғироқ қилиб, А.Ахмадалиев билан биргаликда Навоий вилоятида юрганини айтганини, шунда у улардан автомашинасини олиб келиб беришини, акс ҳолда ИИБ ҳодимларига ариза билан мурожаат қилишини айтганлигини, у унга Гули ўзининг жиянининг номида “ОNIX” русумли автомашина борлигини, банкда кредит эвазига олинганлиги сабабли, унинг номига ўтказиб бера олмаслигини айтиб, Жентра автомашинасини улар залогдан олгунига қадар “ОNIX” русумли автомашинадан фойдалниб туриши мумкин эканлигини айтганини, шу вақтда А.Ахмадалиев билан Гулининг телефон аппарати орқали гаплашганида у унга “ОNIX” русумли автомашина Андижон вилоятида 400 АҚШ доллари эвазига залогда турганлигини айтиб, 400 АҚШ доллари миқдоридаги пул билан Андижон шаҳрига келишини ва залог пулини бериб “ОNIX” русумли автомашинани олиб кетиши мумкинлигини айтганини сўнг у автомашинани Андижон вилоятидан олиб келишга вақти йўқлигини айтганини, шунда у ўзининг укаси “ОNIX” русумли автомашинани Тошкент шаҳридаги ишхонасига олиб келиб беришини, шундан сўнг у ушбу шахсга 400 АҚШ доллари миқдоридаги пулларни бериб юборишини айтганини, 2024 йил 07 март куни соат тахминан 05:30ларда А.Ахмадалиевнинг укаси Ахамадалиев Авазбек унга қўнғироқ қилиб акаси айтган “ОNIX” русумли автомашинани ишхонасига олиб келганлигини айтганини, сўнг у Авазбек Ахмадалиевдан автомашина техпаспортини сўраб олганини, шунда автомашина Тошкет шаҳри давлат рақам белгисида эканлигини билганини, шу ҳолат унда шубҳа пайдо бўлганини, сўнг у 102 хизматига мурожаат қилганини, орадан бироз вақт ўтиб ИИБ ходимлари келишганини, у уларга ҳолатни тушунтирганини, ИИБ ходимлари “ОNIX” русумли автомашина кимга тегишли эканлигини аниқлаш мақсадида Чилонзор тумани ИИБ биносига олиб келишганини билдириб, унга етказилган зарарларни ундириб беришни сўради. Суд, судланувчи ва жабрланувчилар кўрсатувларини эшитиб, жиноят иши ҳужжатларини ўрганиб чиқиб, А.Ахмедалиевнинг жиноят содир этганликдаги айби, унинг айбловга тўлиқ иқрорлик билдириб берган кўрсатуви ва жабрланувчиларнинг кўрсатувларидан ташқари, жабрланувчиларнинг аризаси, тушунтириш хатлари, нарсани кўздан кечириш, юзлаштириш баённомалари, ашёвий далиллар ҳамда жиноят ишида тўпланган бошқа ёзма далиллар билан тўлиқ исботланган деб топади. Суд, судланувчи А.Ахмедалиевнинг ҳаракатларига ҳуқуқий баҳо бериб, дастлабки тергов органи томонидан унинг С.Мажитовни алдаб, ишончига кириб, нархи 15.000 АҚШ долларлик давлат рақами 01Q576XB бўлган “Laсetti” русумли автомашинани ўзининг шахсига оид ҳужжатларини тақдим қилиш орқали 24 соат давомида вақтинча ҳайдаш учун ижарага олиб, мазкур автомашинани ўз вақтида олиб келиб топширмай, номаълум шахсларга сотиб юбориб, пулларини ўз эҳтиёжлари учун сарфлаб юборишда ифодаланган қилмиши фирибгарлик, яъни алдаш ёки ишончини суиистеъмол қилиш йўли билан ўзганинг жуда кўп миқдордаги мулкини қўлга киритиш жинояти аломатлари бўйича Ўзбекистон Республикаси ЖКнинг 168-моддаси 4-қисми “а” банди билан; А.Ахмедалиевнинг Ж.Игамбердиевни алдаб, ишончига кириб, нархи 227.970.000 сўмлик давлат рақам 01R803EC бўлган “Onix” русумли автомашинасини сотиб олишини ва автомашинанинг банк қарздорлигини тўлиқ тўлаб беришни ваъда қилиб, олдиндан 1.500 АҚШ доллари миқдоридаги пулларни бериб, автомашинани 1 ойлик ишончнома асосида вақтинчалик ҳайдаш учун ўзи билан олиб кетиб, берган ваъдасини бажармасдан автомашинани “Carrent-A” МЧЖ биносига гаров сифатида топшириб кетишда ифодаланган қилмиши фирибгарлик, яъни алдаш ёки ишончини суиистеъмол қилиш йўли билан ўзганинг жуда кўп миқдордаги мулкини такроран қўлга киритиш жинояти аломатлари бўйича Ўзбекистон Республикаси ЖКнинг 168моддаси 4-қисми “а” банди билан тўғри квалификация қилинган деб ҳисоблайди. Суд, судланувчи А.Ахмедалиевни Ўзбекистон Республикаси ЖКнинг 33моддаси талабларига риоя қилган ҳолда жиноятлар мажмуи бўйича Ўзбекистон Республикаси ЖКнинг 168-моддаси 4-қисми “а” банди билан жавобгарликка тортишни лозим деб топади. Суд, судланувчи А.Ахмедалиевга жазо тури ва миқдорини тайинлашда, унинг қилмишининг ижтимоий хавфлилик даражасини ва содир этилган жиноятнинг характерини инобатга олишни, шунингдек унинг айбига тўлиқ иқрорлигини, қилмишидан чин кўнгилдан пушаймонлигини жазоси енгиллаштирувчи ҳолатлар деб, шунингдек ҳаракатларида жазони оғирлаштирувчи ҳолатлар мавжуд эмаслигини қайд этиб, унга нисбатан Ўзбекистон Республикаси ЖК 168-моддаси 4-қисми санкцияси доирасида озодликдан маҳрум қилиш жазосини тайинлашни лозим топади. Суд, ҳукм чиқариш кунида 1 АҚШ долларинг сўмга нисбатан қийматидан келиб чиқиб, судланувчи А.Ахмедалиевдан жабрланувчи С.Мажитовнинг фойдасига 193.635.000 (бир юз тўқсон уч миллион олти юз ўттиз беш минг) сўм моддий зарарни ундиришни; иш бўйича ашёвий далил деб топилган давлат рақами 01R803EC бўлган “Onix” русумли автомашинаси жабрланувчи Ж.Игамбердиевга тилхат орқали қайтарилганлигини инобатга олишни; иш бўйича ашёвий далил деб топилган С.Мажитов томонидан тақдим этилган телеграмм ёзишмалари, А.Ахмедалиев томонидан ёзилган тилхатни жиноят иши ҳужжатлари билан билан бирга сақлаш учун қолдиришни лозим топади. Ўзбекистон Республикаси ЖПК 471- 473-моддаларига амал қилиб, суд 454-457, 462, 463, 465-468, Қ И Л А Д И: Ахмедалиев Азизбек Равшанбекович (Axmedaliyev Azizbek Ravshanbekovich) Ўзбекистон Республикаси ЖКнинг 168-моддаси 4-қисми “а” бандида назарда тутилган жиноятни содир қилганликда айбли деб топилсин ва унга шу модда бўйича 8 (саккиз) йил муддатга озодликдан маҳрум қилиш жазоси тайинлансин. Тайинланган жазо умумий тартибли колонияларда ўттатирилсин. Жазо ўташ муддати 2024 йил 29 июндан бошлаб ҳисоблансин. Судланувчи А.Ахмедалиевга нисбатан қўлланилган “қамоққа олиш” тарзидаги эҳтиёт чораси аслича қолдирилсин. Судланувчи А.Ахмедалиевдан жабрланувчи С.Мажитовнинг фойдасига 193.635.000 (бир юз тўқсон уч миллион олти юз ўттиз беш минг) сўм моддий зарар ундирилсин. Иш бўйича ашёвий далил деб топилган давлат рақами 01R803EC бўлган “Onix” русумли автомашинаси жабрланувчи Ж.Игамбердиевга тилхат орқали қайтарилганлиги инобатга олинсин. Иш бўйича ашёвий далил деб топилган С.Мажитов томонидан тақдим этилган телеграмм ёзишмалари, А.Ахмедалиев томонидан ёзилган тилхат жиноят иши ҳужжатлари билан билан бирга сақлаш учун қолдирилсин. Ҳукм устидан апелляция шикояти ва протестлари ҳукм эълон қилинган кундан эътиборан ўн сутка ичида, маҳкум ва жабрланувчилар томонидан эса уларга ҳукмнинг кўчирма нусхаси топширилган кундан эътиборан шу муддат ичида ҳукм чиқарган суд орқали Тошкент шаҳар судига берилиши мумкинлиги, агар ҳукм апелляция тартибида кўрилмаган бўлса кассация тартибида қайта кўрилиши мумкинлиги тушунтирилсин. Раислик қилувчи: С.Мамадиев Маъсул судья: Мамадиев Сарвар Носиржонович